هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

الرئيسية البوابة أحدث الصور التسجيل دخول

أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

5 مشترك

مذكرات بنوتة مفروسة

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 1

مذكرات بنوتة مفروسة

مُساهمة من طرف Sondos الإثنين مارس 08, 2010 11:42 am

مذكرات بنوتة مفروسة..

مقدمة

"صابرين" فتاة مصرية مفروسة.. تطل علينا من خلال كتاب (مذكرات بنوتة مفروسة) الصادر حديثا ضمن "سلسلة عشرينات"، لكي تحكي لك عن مواقف حدثت لها مع "العرسان" الذين تقدموا لخطبتها وعن شخصيات ومواقف قابلتها في حياتها العملية والشخصية..

الكتاب يعد التجربة الأولى لمؤلفته "رغداء بندق"، التي اتبعت الأسلوب الساخر في عرض هذه المذكرات، لتنضم لقائمة الكتاب الشباب الذين سطع نجمهم في عالم الكتابة الساخرة خلال السنوات القليلة الماضية.

....

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 2

رد: مذكرات بنوتة مفروسة

مُساهمة من طرف Sondos الإثنين مارس 08, 2010 11:43 am

(الجزء الاول )

كنت شايلة صينية الشاي ورايحة لأمي وأبويا ...سمعتهم بيتكلموا عن شخص حابيين يزحلقوه، بفضول مني حبيت اعرف مين الشخص ده؟! وقلت أكمل السمع ركنت الصينية على جنب ...ياااااااه ده واضح انه شخص خانقهم أوي ..إيه ده دول بيتآمروا عليه كمان ؟ والظاهر إنهم بيحددودا له معاد يخلصوا فيه منه)

ما الواد أخلاق برضه

- لا يا محمد الواد كويس آه، لكن مستواه مش أد كده؟

- مستواه إيه !! ما هو كل الشباب كده؟ العيال هتجيب منين يعني؟

- مقلناش حاجة بس الكفاءة يا محمد!!! يعني يبقى لا شهادة ولا مال؟!!

- م الواد أخلاق برضه ...وكفاية أنه متدين.

- أيوه ... وهي بنتنا اللي كخة يعني؟!

هنا حسيت بجردل مية ساقع بيرن على أم رأسي... كل الكلام ده عليا أنا!!! هوه أنا مضايقهم للدرجة دي... طبعا بكده إتلغى عنصر الفضول ودخل عليا عنصر حب الاستطلاع مشمر عن ساعديه ودخلت الصينية المطبخ وأخدت موقع استراتيجي وركنت فيه وآآآدي قاعدة!!)

العواطلية كتروا!

- بنتنا مفهاش حاجة ، وزي الفل بس إتأخر عدلها .

- هنعمل إيه بأه ما هو أنت عارف .. البلد حالها واقف ومفيش شغل والعواطلية كتروا.

(ما شاء الله دي هتدخلني في السياسة كمان!!! وأنا مالي أنا ومال العواطلية!!)

- أنا بقول نخليها تشوف الواد ده وخلاص يمكن يحصل النصيب .. ولو إن الواد تنح.

- والله ما أعرف يا محمد البت أخواتها كلهم اتجوزوا ما فضلش غيرها..ونفسي أطمن عليها.

- هنعمل إيه يعني ؟ ما أنتي شايفة اللي بيتقدم شكله ايه؟

( حسيت بحركة أبويا قايم من على كرسيه..جريت من موقعي ودخلت المطبخ أعمل الشاي من جديد)

(يالهوي ..للدرجة دي أنا تعباهم؟ ولو وافقت على أي حد بيجي هيسترحوا يعني!! خلص الشاي ورجعت بالصينية لأمي والدمعة هاتفر من عيني ...ما هو نفسي صعبت عليا برضه ...وقررت أنكشها عشان تفتح الموضوع).

- عملتلك شاي مزبوط إنما إيه كده..اشربي يا حاجة وروقي أعصابك.. أمال بابا فين (بستعبط طبعا).

- بيتوضى.

- ومالك مكشرة كده ليه؟!

- ولا حاجة

(مدت إيدها على كباية الشاي وحسيت بسؤال هيتزحلق من لسانها...فقلت أسيبها.. هي مستوية جاهزة ...و هاتتكلم لوحدها)

- بقولك إيه يا صابرين هو مفيش شباب عندكم في الشغل؟!

- إيه السؤال العجب ده يا آمه ...طبعا في ...ناوية تتبني حد ولا إيه؟

- يعني محدش منهم يتقدم لك؟

( تنحت بشكل مقرف ..وضربت بخيالي في محيط عملي ..لقيت الشباب زمايلي مابين صنفين يا إما شباب هايف يا إما شباب بيئة..يعني م الآخر كده مفيش منهم رجا)

- ولو حد أتقدم يعني...هتوافقي؟؟ (حسيت بوشها بيتهلل استبشارا وابتسمت لغاية ما بانت النغزة على خدها اليمين)

- يعني في حد أتقدم بالفعل؟؟

- يا ستي بيجي ...هو أنا عشان ما بحكيش يبقى حالي واقف ولا إيه!!

- مين بأه؟

- ما بلاش..مش عاوزة أغم نفسك.

- لا لا لا قولي بالله عليكى

- واد كده زميلي ..بس حالته المادية طيييين مرتبة يا دوب ع الأد، وماعندهوش لا شقة ولا دياولو وبيعيل أخواته الأربعة زائد أمه طبعا.

فكيها يا أم العيال

( فجأة تحولت الابتسامة لتجهيمة غريبة وبصيت في عينها لقيت دمعتها محبوسة ..بصراحة أنا مش عارفة الدمعة دي كانت ليه صعبت عليها ولا الموقف نفسه صعب!!! مش عارفة)

- فكيها يا أم العيال ...مش قلت لك بلاش أغم نفسك...ما تلحييش عليا ف السؤال بعد كده

- ده إيه القرف ده؟ هي الناس أتعمت ولا إيه؟ ما هو بناتنا زي الورد وما بيجيش اللي بيقدرهم ليه؟؟ عندك فايزة بنت خالك أحمد دكتورة و معاها عربية ومستواها حلو..مش ليها زمايل دكاترة برضه؟؟ ولا اتعموا دول كمان!!! وعندك بنت الحاجة نادية جارتنا بنتها وصلت 28 ولسه ما أتجوزش والبت بتروح النادي ولها صحاب كتير، ومحدش بيجيلها برضه !!!! وعندك...

(حسيت بأني رميت لها حبل الإنقاذ ..أخدت نفس عميق رد لها الروح) وقالت :

- في واد بيصلي مع أبوكي في الجامع ، عنده 28 سنة ومهندس وساكن في آخر الشارع.

قاطعتها: خلاص هاتوه لما نشوف أخرتها

- إيه رأيك في الخميس اللي جاي بعد العشا؟

ردت بقرف : خلاص يا ستي هاتيه.

طفحت كباية الشاي بصعوبة وقمت على أوضتي ...لما نشوف أخرتها إيه يا مهون هون.

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 3

رد: مذكرات بنوتة مفروسة

مُساهمة من طرف Sondos الخميس مارس 11, 2010 3:49 am

(( الجزء التانى ))

انا متاخرتش اهو

بس الموضوع مش هيخلص في حلقتين عشان موضوع صابرين معصلج حبتين

المهم نيجي للجزء التاني

كنت غرقانة في سابع نومة بعد يوم مرهق في الشغل ...صحيت على صوت أمي العزيزة.

- انت لسة نايمة!!! الراجل قرب يجي.

- راجل مين؟

- راجل مين؟ العريس ياصابرين قومي بأه.

( رميت لحافي على جنب وأنا أتمتم بكلمات الامتعاض بصوت خافت خوفا من ان تسمعني أمي وانكد عليها في يوم زي دة)

- هتلبسي إيه؟

- العباية البيج بالايشارب بتاعها.

- عباية إيه !!! لا البسي التايير الفسدقي ...بلاش العباية بدل ما يفكرك معقدة وإرهابية!

- طيب بلاش.

- أبوكي جاب جاتوه وطبق حلويات شرقية... هنقدم معاهم الحاجة الساقعة والشاي بس؟؟؟

- بس إيه!!! ما تدخليه المطبخ معانا أحسن...هوه مش هيقعد ساعتين ويمشي؟ ولا ناوي يتعشى!!

- وماله يا بنتي ؟!

- ماله إيه؟!... استغفر الله العظيم ...هروح ألبس.

(بعد ساعة تقريبا رن جرس الباب وفتح له أبويا العزيز ووقفت من موقعي أترقب شكله شهقت شهقة كان قلبي هيقف فيها... إيه اللي لابسة ده)

قعد العريس مع أهلي يجي نص ساعة ودخلت وسلمت شفويا وقعدت وتفضل والدي بتقديم العريس

- ده مصطفى مغاوري مهندس في شركة .. وابن حلال وطيب بيواظب ع الصلاة معايا.

- أهلا وسهلا

(وطالت لحظة الصمت وسيادة العريس كما أبو الهول الرد على قد السؤال و كنت بتأمل لبسه كان لابس بنطلون كحلي وبلوفر مشجر بألوان زاهية والقميص كان كاروهات...طبعا الشكل العام للعريس كأن أقرب للوحة من الفن التشكيلي لفنان مبتدئ..)

وسأله والدي عن مرتبه فقال وكله فخر ونشوة:

- أنا يا عمي باخد 500 جنية بحالهم.

(بلعت ريقي من الدهشة لأني لما فكرت فيها لقيت أن لأهله نسبة من المرتب غير إيجار الشقة دة إذا كان معندهوش فما بالكم بمصاريف الحياة اليومية!!!) - وعندك شقة على كده؟

( سؤال طرحته أمي ...وكان بودي أحط ايدي على بؤها ....شقة اية يا غالية بيقولك بيقبض 500 يادوب تجيب له شقة بطيخ)

- بصراحة لأ مجبتش ، بس محوش مبلغ أدفع بيه مقدم لشقق الإيجار الجديد.

- مش مهم يا ابني ... احنا بنشتري راجل.

( راجل !!! وأنا عاوزة أشتري استقرار، قلت لما أسأل أنا بأة لان الوضع مقلق حتى الآن)

- بتقضي يومك إزاي؟

- والله انا من الساعة 8 لغاية 4 ...قولي كده بوصل البيت 5 يادوب أتغدى وأنام وأصحى أشرب كباية الشاي مع الحاجة .وأنزل أشربها تاني مع أصحابي ع القهوة.

(قهوة!!! هو بيتفضل في المرتب حاجة عشان تصرفه ع القهاوي!!!)

- على كده مفيش أي موهبة أو رياضة بتمارسها؟

- هاهاهاهاها لا طبعا معنديش وقت.

- طيب إيه طموحك في الحياة؟

(رد ببلاهة) :

- هه!! يعني القناعة كنز.... بصراحة وأنا راضي بحالي كده.

( حطيت لساني في بؤي وسكت وفتح أهلي كذا موضوع عام كشف عن مدى سطحية التفكير أقصد القشور الباقية من التفكير وعدت الساعتين تقال على قلبي....يا ربي واحد مرتبه يا دوب ع الأد . ومالوش طموح ولا حتى حلم وما يعرفش الدنيا ماشية إزاي وله نفس يخطب ويتجوز!!! وعجبي...قام العريس وروح)

الصدمة ماكنتش في العريس بصراحة... الصدمة كان في سؤال أهلي عن رأيي!!!

وكان الحوار ساخناُ و محتداً والحق يتقال كان واضح إنهم مش مقتنعين بالمرة بالعريس لكنهم في الأول والآخر أهل وبلتمس لهم العذر في إنهم نفسهم يفرحوا بيا... لكن الفرح بالعقل يا ناس).

يتبع..............................................

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 4

رد: مذكرات بنوتة مفروسة

مُساهمة من طرف Sondos الخميس مارس 11, 2010 3:54 am

اتمنى اشوف ردودكم يا بنات على الموضوع اذا عجبكم

علشان اكمل السلسلة من مذكرات صابرين قصدي " بنوتة مفروسة "

...

ياترى عجباكم ولا ليكم رأي تاني في هذه النوعية من الكتابات الحرة ؟؟
وما هي نظرتكم لقضية تأخر زواج البنت ونظرات المجتمع المتناقضة التي تلاحقها ؟؟

اتمنى بجد تستمتعوا معايا بالمذكرات

..

sewar: مشرفة اقسام المرأة العصرية; عدد المساهمات : 53
تاريخ التسجيل : 02/03/2010
العمر : 40

مساهمة رقم 5

رد: مذكرات بنوتة مفروسة

مُساهمة من طرف sewar الخميس مارس 11, 2010 1:29 pm

حلوه والله القصص دي بتحكي عن حكايات بنات جيلنا كمليها ربنا معاكي

الحب المستحيل

الحب المستحيل: مشرفة اقسام المرأة العصرية; عدد المساهمات : 73
تاريخ التسجيل : 28/02/2010

مساهمة رقم 6

رد: مذكرات بنوتة مفروسة

مُساهمة من طرف الحب المستحيل الجمعة مارس 12, 2010 8:41 pm

ده جميلة جدا يا سند
س يا قمراية وبتحكى حال البنت اللى مشلاقيه عريس منا سب فى هذا الزمن اما راى انا فى موضوع تا خير الزواج اولا الزواج ده قمسة ونصيب مش عاوز استعجال وده فى الا ول والا خر رزق من عند الله وفمن الممكن الاستعجال يؤدى الى ندم فنسيب الموضوع على ربنا تقبلى تحياتى وقبلاتى

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 7

رد: مذكرات بنوتة مفروسة

مُساهمة من طرف Sondos السبت مارس 13, 2010 10:48 am

Sewar
الحب المستحيل

متشكرة كتير على ردودكم المشجعة
وارائكم الجميلة

وان شاء الله اكمل السلسلة

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 8

رد: مذكرات بنوتة مفروسة

مُساهمة من طرف Sondos السبت مارس 13, 2010 10:52 am

الجزء التالت

كلمتني إمبارح صديقتي الغالية رشا ودي كانت زميلة لي في الكلية وكانت بنت جدعة ومحترمة م الآخر كده بنت ناس. - والله زمان يا رشا...فينك يا بنتي محدش بيشوفك

- فعلا والله يا صابرين آخر مرة شفتك كان في فرح هبة (صاحبتنا) ..إلا بالحق أخبارها إيه؟

- عقبالك...على وش ولادة أهوه. - ياااااااااه يعني أنا ما شفتكيش من 9 أشهر!!!

- أيوة يا ستي... إنما إيه سر المكالمة الغامضة دي؟

- عريس (قالتها وكأنها جايبة لي هدية...بلعت ريقي وقلت"يا خفي الألطاف نجنا مما نخاف")

- والله ... خير يا وش السعد؟

- طيار وعنده 30 سنة صاحب خطيبي (رشا كاتبة كتابها)، وعنده شقة في مساكن شيراتون.. قلتي إيه؟

- قلت إيه!!! هوه أنتي قلتي حاجة عشان أقول رأيي.... ما تقولي باقي التفاصيل.

- له أخ وأخت أكبر منه وأبوه متوفي من زمان ..والواد كويس مش وحش يعني مستواه المادي معقول.. بس هو طويل حبتين.

- ممممم ياريت تيجي ع الطول ...أهي محلولة بكعب عالي وخلاص.. والله مش عارفة يا رشا..أنت رأيك إيه؟

- أنا باقول شوفيه مش إيه حاجة ... بس لاحظي إن سفرياته كتير.. يعني لو هتشوفيه يبقى خلال الأسبوع ده ...قلتي إيه؟ - مممم وهو كذلك بس هاقول لأهلي الأول
وهاكلمك آخر النهار..ماشي؟؟

- ماشي... أسيبك دلوقت لأن عندي معاد مع مصطفى ومش عاوزة أتأخر عليه...ما هو أنتي عارفة قد إيه قماص.

- ولا يهمك يا رشا ومتشكرة إنك افتكرتيني .. يالا مع السلامة وسلمي على مصطفى.

- الله يسلمك ، مع السلامة. ( يا حلاوة يا ولاد طيار مرة واحدة...يالا على كل لون يا باتيسطة ..لما نشوف....وما كدبتش خبر ورحت وحكيت لأهلي ع المكالمة وطبعا انشكحوا الاثنين وقالوا على بركة الله، على آخر النهار كلمت رشا زي ما وعدتها واتفقنا على مقابلة في النادي يوم الأحد ع الساعة 5.. ويوم السبت سألتني أمي الغالية)

- هتلبسي ايه؟

- إيه رأيك في التايير الفسدقي إياه؟

- لالالا بلاش إلبسي الطقم ده ( ولقيتها محضرة ليا الطقم بالإيشارب!!!).

- وكمان محضراهم ...طيب مش هكسفك وهو كذلك.

- إسمعي ... ما تضحكيش بصوت عالي وخليكي رقيقة وناعمة ...ده طيار يعني الصنف الناعم معاه في السما والأرض.

- حد قال إني راجل...وبعدين أنا هابقى زي ما أنا ...إن كان عاجبه.

- هي رشا هتكون معاكم مش كده؟

- أيوة طبعا أمال هقابله لوحدي!! ومصطفى خطيبها كمان.

- ربنا يقدم إللي فيه الخير( وهي مولية الأدبار سمعتها تمتم بدعاء وبتقول: يارب والنبي يطلع عِدل المرة دي).

وجه يوم الحد ولبست الطقم اللي حضرته ليا أمي وطبعا قبل ما أنزل صليت الاستخارة كالعادة وطول السكة وأنا في العربية أكرر دعاء الاستخارة ومن حسن حظي لقيت ركنة للعربية جنب النادي ولسه هادخل بضهر العربية لقيت واحد ظريف حشر بوز عربيته في مكان الركنة ، ضربت له كلاكس بص لي وابتسم ابتسامة صفرا وشاور لي وقال:

- أنا اللي لقيته الأول.

- ما أنت شايفني بركن بعربيتي...بتدخل ببوز العربية ليه؟

- هاهاهاهاها نصيبك كده بأه ...شوفي لك ركنة تانية. ( طبعا اتخنقت منه ومن رخامته وقلت أأقصر معاه ما هو أنا مش ناقصة تأخير ولفيت حوالين النادي حوالي 3 أو 4 مرات على ما لقيت ركنة بطلوع الروح .. ودخلت النادي وأنا متغاظة من الظريف اللي أخد مكاني وكان سبب في تأخيري عن الموعد. وصلت للتراس (ودي فًسحة كبيرة فيها ترابيزات وكراسي) وكانت المفاجأة!!!!)

يتبع

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 9

رد: مذكرات بنوتة مفروسة

مُساهمة من طرف Sondos السبت مارس 13, 2010 10:56 am

الجزء الرابع

أول ما حطيت رجلي في التراس (الفسحة إياها) لقيت رشا بتشاور لي من مكانها ..رحت لها وأنا بادندن "واثق الخطوة يمشي ملكا" للست أم كلثوم ألف رحمة ونور عليها ..و أول ما قربت ناحية الترابيزة، فوجئت بأن العريس هو نفس الشخص اللي أخد مكاني في الركنة، ومن زيادة ظرفه لما رشا ومصطفى بيعرفونا على بعض قال:

- مفيش داعي للتعريف.. سبق واتعرفنا.

( كان نفسي ساعتها أدلق كباية العصير عليه اللي سيادته كان بيشربها أثناء ما كنت أنا بلف حوالين النادي بادور على ركنة في عز الحر.. وبما إني مفروسة منه حبيت أحرجه قدام صاحبه)

- أصل الكابتن حشر عربيته مكان ما كنت أنا هركن (كنت متخيلة إني فعلا بحرجه ...لكن الظاهر أني قلت له نكتة).

- هاهاهاهاهاها أيوة ده حصل صحيح .. هاهاهاهاهاها أصل الدنيا فرص يا آنسة ما بتتعوضش ...شفتي أنت أتأخرت إزاي على ما جيتي!

( كنت عاوزة أقوله إن قلة ذوقه هي اللي أخرتني مش تضيعي للفرصة... وحبت رشا تلطف من الجو، فطلبت لي حاجة ساقعة، وأتكلمنا في موضوعات كتير .. عامة الجدع كان مثقف إلى حد ما لكن كان استعراضي بشكل يشل لدرجة إني فكرت أأقوله يقدم في فرقة الـ "راشن شو")

- لما كنت في إيطاليا دخلت برج بيزا وكان..... ولما كنت في الهند ركبت الفيل أما لندن فشعبها بارد صحيح لكن.. وأما باريس... ولما كنت في ماليزيا قابلت .....

(يااااااااااااااااااه ملهوش قفله ده!!! الله يسامحك يا رشا ده محدش فينا اتكلم بغير عبارات التأييد وهز الراس... هيسكت إمتى ده!! وأدن علينا المغرب فوجدتها فرصة أريح فيها وداني شوية فقلت أستأذن وآخد رشا عشان نصلي... وبالفعل أخدتها وإحنا في السكة).

- ها يا صابرين إيه رأيك ؟

- إنتي تخرسي خالص...إيه الراديو ده!!

- ليه يا بنتي! دي أول قاعدة بتبقى تعريف ببعض.

- أيوة يا ستي نتعرف ببعض..مش يعرف نفسه بس .. ده مش ناقص غير أنه يحكي لنا يومياته... ده لغاية دلوقتي ما يعرفش عني حاجة بالله عليكى بعد ما نصلي ..حاولي تقصري يا رشا أنا صدعت.

- يا بنتي الواد كويس ...طب إدي لنفسك فرصة تانية.

- فرصة إيه بس؟ تعالي بس نلحق الصلاة.

(وصلينا ورجعنا للجماعة فسألت رشا خطيبها )

- صليت يا مصطفى؟

- لا قايم أهو...مش هتقوم معايا يا خالد؟

(طلع اسمه خالد... ما كنش عنده وقت يعرفني باسمه لكن مش ده الغريب..الأغرب انه قال لمصطفى) :

- روح أنت وأنا هاحصلك.

( وراح مصطفى وصلى ورجع والعشا أذنت وأخينا ماقمش من مكانه... واستعدينا نمشي وفي المواقف اللي زي دي ..كنت أتوقع أن العريس يقوم بدفع الحساب ولو من باب الذوق لكن المفاجأة لما قال) :

- لا يا جماعة ...إحنا نمشي نظام إنجليزي ( يقصد إن كل واحد يدفع حساب طلباته).

(طبعا مصطفى وخطيبته شكلهم كان وحش جداااا..وحاول مصطفى يداري الموقف...لكن البعيد صمم إنه يدفع ع الأقل لنفسه..لأنه تربية إنجلترا والحق ما يزعلش حد.. ده حسب ما قال.. وروحنا بيوتنا وحكيت للغالية اللي حصل فاتجرعت ألمها وقالت جملة واحدة:

- حسبي الله ونعم الوكيل.

الجملة فعلا عادية، لكن غير العادي هو حُرقتها وهي بتقول الجملة، وفعلا صعبت عليا أمي وصعبت عليا نفسي ما هو الإنسان طاقة برضه ... واتصلت بيا رشا تعتذر عن العريس والإحراج اللي سببه لنا كلنا..وكان مبررها أنه صاحب مصطفى من بعيد - مش صاحبة أوي يعني- وطبعا قبلت اعتذارها بصدر رحب وأنا حيلتي غيره

يتبع

sewar: مشرفة اقسام المرأة العصرية; عدد المساهمات : 53
تاريخ التسجيل : 02/03/2010
العمر : 40

مساهمة رقم 10

رد: مذكرات بنوتة مفروسة

مُساهمة من طرف sewar السبت مارس 13, 2010 12:48 pm

ههههههههههههههههههههههههههههههههههههههههه والله حلوة تصدقي ان في شباب كتير بيتقدموا بيعملوا كده كأنه فعلا بيتكلم عن نفسه بس والبنت تسمع وخلاص بس جدعه انها طنشته كفايه انه مبيصليش لا وكمان بخيل ياساتر

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 11

رد: مذكرات بنوتة مفروسة

مُساهمة من طرف Sondos الأربعاء مارس 17, 2010 2:11 pm

sewar كتب:
ههههههههههههههههههههههههههههههههههههههههه والله حلوة تصدقي ان في شباب كتير بيتقدموا بيعملوا كده كأنه فعلا بيتكلم عن نفسه بس والبنت تسمع وخلاص بس جدعه انها طنشته كفايه انه مبيصليش لا وكمان بخيل ياساتر

شكراً يا سوار على الرد والمتابعة ...
ربنا يخليكي ليه يا قمر

cat

cat

cat

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 12

رد: مذكرات بنوتة مفروسة

مُساهمة من طرف Sondos الأربعاء مارس 17, 2010 2:16 pm

الجزء الخامس

على فكرة يا جماعة العريس الطيار ده حرق دمي انا كمان

بس بجد بيبقى فيه كتير عرسان كده يعني مش حدوتة وخلاص

والواحد منهم بيبقى حاسس انه لقطة وميترفضش

المهم نيجي للجزء الخامس

وفي أقرب جلسة مع صديقاتي

- واللي كانت في منزل إحداهن

- وأثناء علو ضحكاتنا سألت:

- إيه رأيكم نتعرف على بعض أكتر ..

يعني (وقلتها وكلي خجل) إيه مواصفات فتى أحلامكم؟؟

(فجأة سكتت الضحكات وعلت الوجوه دهشة غريبة وتجهمت وجوه..ووجوه أخرى كساها الاصفرار، وتوقفت حركات من كان يتحرك، ووقفت اللقمة في حلق من كان يأكل.. كل ده عشان سؤال!! وكأني وقفت الجلسة بـ pause )

- خلاص يا جماعة
حقكم عليا...ما كنش سؤال. (و أخيرا نطقت واحدة منهن)

- أنت لسه مفكراه فتى؟؟ يا بنتي ده زمانه دخل في الشيخوخة.

(وصوت تاني) - يااااااااااااااااااااه يدينا ويديكي طولة العمر...بتألبي علينا المواجع ليه بس يا صابرين!! (وأخيرا انكسر حاجز الصمت وبدأت كل واحدة فينا تعلق بشكل ساخر حتى إن عيونا دمعت من الضحك ...وقلت)

- لا بجد يا جماعة يعني لما نعرف كل واحدة نفسها في عريس شكله إيه ...أكيد هانتعرف على أحلامها و شخصيتها بشكل أقرب.

- والله فكرة ...وأدينا بنتسلى.

(كانت دي سمية.. صحفية طموحة،عمرها 24 سنة، أصغر بنوتة في الجلسة.. مستريحة بالأوي .... مادياً طبعا)..

- طب نبدأ بيك يا سوسو.

(تبدا سوسو بكل خفة ودلع ...وتتنحنح وكأنها ستلقي خطبة عصماء فتقول)

- ماشي... بصوا بصراحة كده أنا نفسي في شاب طويل رجل أعمال.. دكتور.. مهندس حاجة زي كده ، ما عنديش مشكلة إذا كنت هاقعد في البيت أو أشتغل؛ لأني مؤمنة بأن تكوين الأسرة أهم، ياسلااااام لو كان أبيض وشعره أسود يااااااااااااااي ..

يجنن.. بذمتكم مش كده؟ ( بصراحة لأول مرة أتعرف عليها بالشكل ده رغم إني اعرفها من حوالي سنة ، لكن قطع تفكيري سؤال واحدة مننا لسوسو)

- بس كده؟؟

- بالتأكيد لازم يكون بيصلي ومتدين.

(ردت شيماء ودي بنوته عندها 27 سنة كانت أكبر مني بدفعتين في الكلية، عاقلة، متدينة، عاشت في الكويت فترة)

- إنتي بتتكلمي بجد ولا بتهزري؟ (كانت ملامح شيماء غريبة بدأت بامتعاض فتجهم فتكشيرة لا ملامح لها)

- وإيه الهزار في كده ...أنا بحب الاستايل ده حاجة كده شبة...."أحمد الشريف". (حبيت أصحح لها المعلومة )

- اسمه عمر الشريف. ( ابتسمت وردت عليا رد أظهر مدى جهلي بالساحة الفنية)

- عمر مين ياستي أنا أقصد أحمد الشريف بتاع ستار أكاديمي.

- والله.... ده التونسي اللي كان مع محمد عطية!!

- اسم الله عليك...شفتوه أمور إزاي! (ردت شيماء بسخرية)

- لا يا حلوة ... شفناكي أنت. ( وبالطيع كانت تقصد إننا شفنا سمية الجديدة علينا بسنها وأحلامها وطلباتها، بصراحة كنت سعيدة من أن سؤالي نجح في إنه يعرفنا على بعض بالفعل.. وعشان السهرة تحلى سألت)

- وأنت يا شيماء عاوزة إيه؟ ( ردت شيماء بحياءها المعهود وبراءتها الجميلة وبدأت كلامها بـ

- كل اللي في ذهني أن ربنا يرزقني بمن يتقي الله فيا وما يهمنيش بيشتغل إيه..ولا يهمني مستواه المادي ولا شبه عمر الشريف..ولا حتى إسماعيل يس .. لأني
مؤمنة إن اللي يراعي حق ربنا أكيد هيراعي حقي.

(قاطعتها إحدانا بسخرية) - عظمة على عظمة يا ست.... هييييييييييييييييييييييييييي.

- باتكلم جد والله ونفسي نرتقي مع بعض دينيا ودنيويا ...أنا على استعداد أقبل لو هوه أقل من مستوايا (اجتماعيا وماديا طبعا ) بس بشرط إني ألمس فيه الطموح والعزيمة اللي بيها نذلل أي عقبه قدامنا. (ردت سمية)

- والله حلو .. .بس أنا معنديش استعداد آخد واحد لسه هايبني نفسه...اللي مامعهوش مايلزموش.

(وسألت شيماء أروى ودي أهدى و أرق بنوته في الجلسة)

- وأنت يا أروأ؟؟؟ (تقصد يا أروق )

يتبع

sewar: مشرفة اقسام المرأة العصرية; عدد المساهمات : 53
تاريخ التسجيل : 02/03/2010
العمر : 40

مساهمة رقم 13

رد: مذكرات بنوتة مفروسة

مُساهمة من طرف sewar الأربعاء مارس 17, 2010 2:53 pm

ميه ميه ياعسل انتي فعلا البنات ليها احلام عجيبه اللي تقولك نفسي في شقه وعربية وعزبه ههههههههههههههههههههههههه الاهم في كل ده انه يكون شخص صالح وبتاع ربنا ويخاف عليها ويحترمها الفلوس بتروح وتيجي لكن البني ادم الكويس ميتعوضش والشهادات مبتنضفش مخ بني ادم ياما بنسمع ان داكتره جامعين بيضربوا مراتتهم او العكس صحيح الاهم التوافق الفكري والاجتماعي بين الطرفين واتقاء الله وحسن المعاشره

جنى: بسكوتاية جديدة; عدد المساهمات : 23
تاريخ التسجيل : 06/04/2010

مساهمة رقم 14

رد: مذكرات بنوتة مفروسة

مُساهمة من طرف جنى الأربعاء أبريل 07, 2010 10:00 am

ههههههههههه موضوع حلو اوى اوى Laughing

Laughing

Sondos: مشرفة عامة; عدد المساهمات : 46
تاريخ التسجيل : 27/02/2010

مساهمة رقم 15

رد: مذكرات بنوتة مفروسة

مُساهمة من طرف Sondos الأربعاء أبريل 07, 2010 1:44 pm

الجزء السادس

( بصراحة قبل ما تحكي أروى طلباتها .. كانت نفسي حمضت من البنات.. إيه الطلبات الغريبة دي!

يعني سمية اللي عاوزة دكتور دي ماهو والدها تاجر أمي أصلا بتتشرط على إيه!! واللي عاوزاه متدين وبس ماهو اتقدم لها واحد قبل كده وهي نفسها حكت لي عنه ورفضته لإنه لسه قدامه كتير على ما يقف على رجليه)...

فعلا سهل علينا جدا نقول شعارات لكن من الصعب تنفيذها... وبصراحة دعيت إن ربنا يمسك عليا لساني عشان ما أخبطش في واحدة منهم...

المهم إن أروى بدأت كلامها وهي بتشاور بإيدها وكأنها بترسم لوحة فنية ، وهندمت نفسها وكأنها في استديو تصوير واتنكت قوي في قعدتها وبصت للسما وقالت)

- نفسي في واحد زي.. زي "محمد بن راشد آل مكتوم" * متدين وشاعر وفارس ونبيل ووسيم وعربي صميم... أقصد انه أن فيه كل مميزات الرجل الحُلُم ( والرجل الحُلُم دي – بضم الحاء- من لزمات أروى لإنها بتكلمنا كتير بالفصحى وفقا لتخصصها...

وبدأت التعليقات الساخرة منهم والساخطة مني - فيما بعد- على أروى تنزل عليها زي المطر)

- دي راسمة على طمع...وربنا الدش بوظ أخلاقها.

- بتحلم دي ولا اية.... اصحي.

- البت دي هتنقطي بهدوئها...وأنت إيه أصلا عشان يجيلك واحد زي مكتوب ده!!

- مكتوم يا جاهلة....فعلا العلام حلو ياولاد.

(لالالالالالالالالا لحد كده وكفاية ... وماقدرتش امسك لساني أكتر من كده)

- إيه اللي بتقولوه ده الحلم إن مكانش ممكن تحقيقه يبقى مفيش داعي له أصلا... وبعدين

– سامحيني يا أروى- واحد زي مكتوم ده يجيلك ليه! وإزاي؟ مش لما نحلم نبقى واقعين في أحلامنا!!!... وأنت يا سوسو مين قال إن الدكتور ولا رجل الأعمال ممكن يحقق لك حياة سعيدة... وصحيح الدين أساس الاختيار يا شيماء لكن لابد من تكافؤ يعني الارتباط بيبقى زي كفتي الميزان لابد من التوازن عشان ماتطبش كفة على التانية وإلا الجواز هيفشل.

( خلصت كلامي من هنا .... وبصيت بنظرة سريعة على وش كل واحدة فيهم وكأن على رؤسهم الطير...البنات متنحين بالفعل ... ماعدا عبير واللي كان الدور عليها ولسه مااتكلمتش أول ماجت عيني في عينها قالت)..

- أنا ماتكلمتش خالص ...وبعدين أنا مخطوبة أصلا ...فماتجيش ناحيتي.

( من كلام عبير ولهجتها الحادة الطريفة، بدأنا في هيستيرية ضحك وبالطبع لأني خبطت في الكلام فاعتذرت بكل عزة وشموخ و قالت لي واحدة منهم)

- لما أنت واقعية وعاقلة كده .... ما تقولي على طلباتك ولا أنت قلتي البقين دول عشان تهربي من السؤال ولا إيه؟؟

- أبدا والله ...أنا ماليش لا أحلام ولا طلبات ...وأحطها ليه أصلا وأنا عارفة أن بيها ولا من غيرها مش هتجوز غير اللي كاتبه ليا ربنا ده إذا كان كاتب لي جواز أصلا.

- يا سلام يا رزينة يا متدينة أنت!!

- فعلا والله .... الشرط الوحيد ليا هو أني أكون مرتاحة ومقتنعة، غير كده أمور متفاوتة من السهل نعديها ونتجاوزها بالعقل والواقع.

( وكملنا قعدتنا عن الشغل ومشاكله، وعن أطرف المواقف اللي بناقبلها في حياتنا اليومية، وعن أمهاتنا وإلحاحهم علينا نشوف ده وندي فرصة تانية لده ... اكتشفنا إن كل أمهاتنا زي بعض وده لإنهم عاوزين يفرحوا بينا ويشوفوا عيالنا)...

وروحت البيت وأنا حاسة بضغطي المرتفع.... لإن كان في كلمة مزنوقة في بقي ماقلتهاش للبنات وكان نفسي أقولها لهم لكن خفت على مشاعرهم ومفيش داعي أحرجهم أكتر من كده خاصة وإني ماقصرتش معاهم... كان نفسي أقولهم قبل ما واحدة مننا - أوحتى واحد منهم- قبل ما يبدأ بسرد أحلامه وطلباته لازم يصارح نفسه بعيوبه بمعنى أدق... لازم نقف قدام مراية صافية ونقية - وكلها حُنية- نشوف فيها عيوبنا فنعرف قدرنا وعلى أساسها نحط طلباتنا..... وعجبي)

يتبع

sewar: مشرفة اقسام المرأة العصرية; عدد المساهمات : 53
تاريخ التسجيل : 02/03/2010
العمر : 40

مساهمة رقم 16

رد: مذكرات بنوتة مفروسة

مُساهمة من طرف sewar الأربعاء أبريل 07, 2010 3:43 pm

جميل ياسندوسه كملي ربنا معاكي ولا الطب واخدك مننا

Ø¨Ø³ÙƒÙˆØªØ© Ù‡Ø§Ù†Ù…

Ø¨Ø³ÙƒÙˆØªØ© Ù‡Ø§Ù†Ù…: مديرة عامة; عدد المساهمات : 357
تاريخ التسجيل : 25/02/2010

مساهمة رقم 17

رد: مذكرات بنوتة مفروسة

مُساهمة من طرف Ø¨Ø³ÙƒÙˆØªØ© Ù‡Ø§Ù†Ù… الثلاثاء يونيو 15, 2010 12:01 pm

فينك يا سندس

الوقت/التاريخ الآن هو السبت نوفمبر 23, 2024 2:34 am